Azərbaycan yeni uğurlara nail olacaq
Prezident İlham Əliyev : “Dünyada baş verən maliyyə böhranına baxmayaraq, Azərbaycanda dinamik inkişafın və iqtisadiyyatın çoxşaxəliliyinin təmin olunmasında böyük işlər görülüb”
Ötən həftə Davosda “Dünya iqtisadi liderlərinin qeyri-rəsmi toplantısı – 2012-ci ilin öhdəliklərinin müəyyənləşdirilməsi” mövzusunda toplantı keçirilib.
İsveçrənin Davos şəhərində 42-ci Dünya İqtisadi Forumunun illik toplantısında müasir dövrün siyasi-iqtisadi problemləri, eləcə də qlobal inkişafın doğurduğu əsas problemlərin həlli üçün işgüzar tərəfdaşlığın genişlənməsi ilə bağlı məsələlər müzakirə olunub.
Toplantıda 100-dən artıq ölkədən 2500-dən çox nümayəndə, o cümlədən dövlət və hökumət başçıları, eləcə də tanınmış şirkətlərin təmsilçiləri, iqtisadçılar, alimlər, ekspertlər, beynəlxalq təşkilatlar və KİV-lərin rəhbərləri iştirak ediblər. “Dünya iqtisadi liderlərinin qeyri-rəsmi toplantısı – 2012-ci ilin öhdəliklərinin müəyyənləşdirilməsi” mövzusu nahar əsnasında keçirilən paneldə müzakirə olunub.
Azərbaycan prezidenti İlham Əliyev toplantıda çıxış edib. Dövlət başçısı ölkəmizin keçdiyi tarixi inkişaf yolu, demokratik ənənələrə söykənən dövlətçilik tarixindən danışıb, bildirib ki, Şərqdə ilk demokratik respublika məhz Azərbaycanda 1918-ci ildə yaradılıb.
Prezident İlham Əliyev ölkəmizin XX əsrin sonlarında müstəqilliyini yenidən bərpa etdiyini bildirib, 20 il ərzində Azərbaycanda dövlət quruculuğu, demokratiyanın təmin olunması, siyasi-iqtisadi sahələrdə görülən işlər, ictimai-siyasi sabitlik və digər məsələlərə toxunub. Azərbaycan prezidenti diqqətə çatdırıb ki, son illər ölkəmizdə ictimai-siyasi sabitliyin təmin olunması və demokratiyanın inkişafında böyük addımlar atılıb.
Azərbaycanın zəngin enerji ehtiyatlarına malik olduğunu vurğulayan dövlət başçısı bu gün respublikamızın Avropanın enerji təhlükəsizliyinin təmin olunması işində fəal iştirak etdiyini və bu sahədə böyük nailiyyətlər qazanıldığını, həmçinin əlverişli coğrafi-siyasi məkanda yerləşən ölkəmizin beynəlxalq aləmdə regional əməkdaşlıq işlərinə mühüm töhfələr verdiyini də bildirib.
Azərbaycanın beynəlxalq nüfuzunun durmadan artdığını qeyd edən prezident İlham Əliyev deyib ki, ölkəmizdə bu gün qeyri-neft sektoruna da böyük diqqət yetirilir. Dövlət başçısı ölkəmizdə informasiya-kommunikasiya texnologiyaları, sənayeləşdirmə və digər sahələrin inkişaf etdirilməsi istiqamətində həyata keçirilən işlərdən danışıb. Prezident İlham Əliyev deyib ki, dünyada baş verən maliyyə böhranına baxmayaraq, Azərbaycanda dinamik inkişafın və iqtisadiyyatın çoxşaxəliliyinin təmin olunmasında böyük işlər görülüb.
Prezident İlham Əliyev Azərbaycanda təhsilin inkişafına dövlət səviyyəsində göstərilən diqqəti də qeyd edib. Azərbaycanın qarşısında bütün sahələrin inkişafı ilə əlaqədar mühüm vəzifələrin durduğunu bildirən dövlət başçısı ölkəmizin bu istiqamətdə səylərini davam etdirəcəyinə və yeni uğurlara nail olacağına əminliyini bildirib.
Toplantıda, eyni zamanda, Ukrayna prezidenti Viktor Yanukoviç və Rusiyanın “VTB Bank”ının prezidenti Andrey Kostin də çıxış ediblər.
Sonra toplantı iştirakçıları sualları cavablandırıblar.
ABŞ yenidən defolt təhlükəsi ilə üz-üzə qalıb
Vüqar Bayramov: “Gözlənilən təhlükə artıq valyuta bazarlarında hiss edilməkdədir”
ABŞ Senatı Barak Obamanın borc limitinin yenidən artırılması istiqamətində təklifini qəbul etməyib. Bu isə yaxın zamanlarda borc məbləğlərində atrım olarsa defoltun baş verəcəyi deməkdir.
İqtisadi və Sosial İnkişaf Mərkəzinin rəhbəri Vüqar Bayramov ANS PRESS-ə bildirib ki, hazırda ABŞ ən çox borca malik olan ölkədir: “Praktiki Amerikanın faiz borcu 16 trilyon dollara yaxınlaşıb. Hansıki bu ümumi daxili məhsuldan çoxdur. Eyni zamanda adambaşına düşən xarici borc məbləği 48 min dollardır. Amerikada hər bir şəxsin 48 min dollar borcu var”.
Məlum olur ki, ABŞ-dan sonra ən çox borca malik ölkə Böyük Britaniyadır. Bu ölkənin 9 trilyon borcu var: “Böyük Britaniyada adambaşına düşən borcun məbləği 144 min dollar təşkil edir.. Bu da Böyük Britaniyanın xarici borcunun ölkənin ümumi daxili məhsulundan 4 dəfə çox olması deməkdir. Britaniyadan sonra digər borclular sırasında Fransa, Yaponiya, Hollandiya, Ispaniya, İtaliya daxildir. Dünyada 15 ölkənin xarici borcu 1 trilyon dollardan çoxdur. Sadəcə digər ölkələrdən fərqi olaraq Amerika qanunvericiliyində borcların məbləği ilə bağlı limit var. Borclar həmin limiti keçərsə və qanunverici orqan limitin artırılması istiqamətində qərar qəbul etməzsə defolt qaçılmaz olur”.
İqtisadçının sözlərinə görə, gözlənilən təhlükə artıq valyuta bazarlarında hiss edilməkdədir: Belə ki, avronun dollara nisbətən məzənnəsinin azalması tendensiyası müəyyən qədər yumşalıb: “Son günlər avronun məzənnəsi 1 avro 1 dollar 26 sentdən 1 dollar 29 sentə qədər yüksəlib. Bu heç də Avropa Birliyində böhranın aradan qaldırılması ilə bağlı deyil. Amerikanın defolt təhlükəsi yaşaması səbəbindən avro ilə yığım kimi dollarla yığım da azalıb”.
Bill Qeyst BMT fonduna ianə vəd etdi
İsveçrənin Davos şəhərində keçirilən Ümumdünya İqtisadi Forumunda Microsoft şirkətinin milyarder sədri Bill Qeyts BMT-yə çətin günlərdə maliyyə dəstəyi göstərəcəyinə söz verib. Dünya şöhrətli milyarder və xeyriyyəçi BMT-nin QİÇS/HİV əleyhinə fonduna 750 milyon dollar ianə verəcəyini bildirib. Çıxışı zamanı Qeyts hökumətləri fonda dəstək olmaqla insanların həyatlarını xilas etməyə çağırıb.
"İqtisadi nöqteyi nəzərdən çox çətin günlər yaşamağımıza baxmayaraq, bu, dünyanın ən kasıb ölkələrinə yardımın azaldılması üçün bəhanə olmamalıdır. Dünya fondu pulları yatırmaq üçün ən yaxşı yollardan biridir", deyə B. Qeyts bildirib.
Şimali Koreya yemək tapmır
Çin Şimali Koreyaya ərzaq yardımı göstərir
Cənubi Koreyanın insan hüquqları qrupu bu ayın əvvəli Çinin yoxsul Şimali Koreyaya ərzaq yardımı göndərdiyini ehtimal etdiklərini deyiblər.
Seulda əsaslanmış insan hüquqları və Şimali Koreya Qaçqınları üçün Vətəndaş Koalisiyasının nümayəndəsi Do Hi Yun bildirib ki, Çin Qəməri yeni il bayramından təxminən 10 gün əvvəl təcrid edilmiş ölkəyə düyü və digər məhsullar göndərib.
O, Şimali Koreyaya başqa növ yardımların da göndərildiyini ehtimal etdiyini bildirib. Bu gün insan haqları qrupu Çin sərhədində yerləşən Tumen stansiyasında təşkilatın üzvləri tərəfindən çəkilmiş şəkilləri yayıb.
Sarkozinin “qara günləri” başlayır
Fransalı senatorların qondarma "erməni soyqırımı"nın inkarına görə cinayət məsuliyyətini nəzərdə tutan qanunun ləğv edilməsi tələbi ilə Konstitusiya Şurasına müraciət etməsi Fransa Prezidenti Nikola Sarkozini narahat edib. Məlumata əsasən, Sarkozi bir qrup parlamentarilərlə keçirdiyi görüşdə bəzi senatorların adıgedən qanunun ləğvi tələbi ilə Konstitusiya Şurasına müraciət etməsinə görə narahat olduğunu deyib.
Sarkozinin parlamentarilərə "bu addım mənə xidmət etmədi" şəklində ifadə işlətdiyi bildirilir.
Fransalı senatorlar qondarma "erməni soyqırımı"nın inkarına görə cinayət məsuliyyətini nəzərdə tutan qanunun ləğv edilməsi tələbi üçün lazımi sayda imza toplayıblar.
Senatorlar lazım olan 60 imza əvəzinə 70 imza toplayıblar, bununla da onlar Konstitusiya Şurasına müraciət ediblər.
Yanvarın 23-də Fransa Senatı təxminən, səkkiz saatlıq müzakirələrdən sonra qondarma "erməni soyqırımı"nın inkarına görə cinayət məsuliyyətinin tətbiqi barədə qanun layihəsini qəbul edib. Qanun layihəsinin lehinə 127, əleyhinə isə 86 senator səs verib.
Fransa Senatının alt palatası keçən il dekabrın 22-də qondarma "erməni soyqırımı"nın inkarına görə cinayət məsuliyyətini nəzərdə tutan qanun layihəsini qəbul edib.
Qanun layihəsi qondarma "erməni soyqırımı"nı inkar edənlərə qarşı bir ilədək azadlıqdan məhrumetmə cəzası və 45 min avro həcmində cəriməni nəzərdə tutur.
Ermənistan və erməni lobbisi bəyan edir ki, Türkiyənin sələfi olan Osmanlı dövləti 1915-ci ildə Anadoluda yaşayan ermənilərə qarşı soyqırım törədib. Erməni təbliğatının təzyiqi ilə bir sıra ölkələrin parlamentləri 1915-ci il qondarma "soyqırım"ı tanıyıblar.
Rusiyanın sənaye və ticarət naziri postunu tərk etdi
Srağagün Rusiyanın sənaye və ticarət naziri Viktor Xristiyenko postunu tərk edib. Rusiya prezidenti Dmitri Medvedev bununla bağlı fərman imzalayıb.
Viktor Xristiyenko Avrasiya İqtisadi Komissiyasının Kollegiyasına rəhbərlik edəcək. Kremlin mətbuat xidmətinin yaydığı məlumata görə, Viktor Xristiyenko xidmətləri, sənaye sahəsində dövlət siyasətini həyata keçirməsi ilə bağlı “Şərəf” ordeni ilə də təltif olunub. Rusiya prezidentinin mətbuat xidməti Viktor Xristiyenkonun Rusiya, Belarus və Qazaxıstanın inteqrasiya məsələləri ilə məşğul olacağını qeyd edib.
Rusiya mətbuatı sənaye və ticarət naziri postunu Viktor Xristiyenkonun müavini Denis Manturovun tutacağını yazıb.
