Təqaüdlər artırılacaq
Dövlət Sosial Müdafiə Fondu (DSMF) bu günlərdə 2011-ci il ərzində istehlak qiymətlərinin indeksinə uyğun olaraq əmək pensiyalarının sığorta hissəsinin indeksləşdirilməsini həyata keçirəcək. Bu barədə DSMF-nin sədri Səlim Müslümov Xəzər-Avropa İnteqrasiya İşgüzar Klubunun (CEIBC) üzvləri ilə görüşündə bildirib.
“Biz Dövlət Statistika Komitəsinə müraciət etmişik və bu barədə məlumatlar almışıq. 2011-ci ildə istehlak qiymətlərinin indeksi 7,9 faiz təşkil edib. Bu ondan xəbər verir ki, 2012-ci il yanvarın 1-dən əmək pensiyalarının sığorta hissəsi 7,9 faiz artacaq”, - Müslümov deyib.
Onun sözlərinə görə, bu, bu il üçün birinci artımdır və sonrakı artım sosial sığortadan daxilolmaların həcmindən asılı olaraq aparılacaq.
“Əgər bizim əməkhaqlarının leqallaşdırılması üzrə tədbirlərimiz və əməkçilərin qeydiyyatı öz effektivliyini göstərərsə, onda pensiyaların artırılması üzrə baza yaradılmış olacaq”, - o deyib.
Azərbaycanın adı dəyişiləcək?
YAP icraçı katibinin müavini: “Azərbaycan Respublikası Şimali Azərbaycan adlandırıla bilər”
Milli Məclisin srağagünkü iclasında BAXCP sədri, millət vəkili Qüdrət Həsənquliyev Azərbaycan Respublikasının Şimali Azərbaycan adlandırılmasını təklif edib. Qüdrət Həsənquliyev Azərbaycan Respublikasının tarixi torpaqlarımızın 30 faizində yerləşdiyini xatırladıb: “Bu, Cənubi Azərbaycandakı soydaşlarımıza da mane olur. Çünki onlara deyirlər ki, azərbaycanlılar müqəddəratını müəyyənləşdirib, Azərbaycan Respublikası yaradılıb. Ona görə də təklif edirəm ki, Azərbaycan Respublikasının adı dəyişdirilsin, Şimali Azərbaycan Respublikası qoyulsun. Biz bununla tarixi ədaləti də bərpa edərik”.
Millət vəkili Fərəc Quliyev bu təklifi dəstəkləyib. YAP icraçı katibinin müavini Siyavuş Novruzov bu gün dünyada Şimali Koreya və Cənubi Koreyanın olduğunu xatırladıb: “Azərbaycanla bağlı da bu metoddan istifadə oluna, Şimali Azərbaycan adı qoyula bilər”.
Diqqət: satışda saxta qızıl əməliyyatı
Satışda olan bəzi məmulatların dövlət əyar damğası ilə damğalanmadığı müəyyən olunub
Maliyyə Nazirliyinin Qiymətli Metallara və Qiymətli Daşlara Nəzarət Dövlət Xidməti tərəfindən ticarət mərkəzində aparılan nəzarət tədbirləri zamanı üzərində göstərilmiş əyarlara uyğun gəlməyən, hətta qiymətsiz metallardan hazırlanmış məmulatlar satıldığı aşkar edilib.
Nazirliyin mətbuat xidmətindən verilən məlumata görə, Dövlət Xidməti tərəfindən "Qiymətli metallar və qiymətli daşlar haqqında" Azərbaycan Respublikası qanununun tələblərinə əməl edilməsi ilə bağlı həyata keçirilmiş əyar nəzarəti tədbirləri zamanı Bakı şəhəri, Nəsimi rayonu, Cavadxan küçəsi, 3005-ci məhəllə ünvanında yerləşən "Çiçək" kooperativinə məxsus "Sofulu" Ticarət Mərkəzində dövlət əyar damğası ilə damğalanmayan, standartlara cavab verməyən, üzərində göstərilmiş əyarlara uyğun gəlməyən, hətta qiymətsiz metallardan hazırlanmış məmulatların istehlakçılara təklif edilməsi faktlarının kütləvi xarakter daşıdığı müəyyən edilib.
Belə ki, adıçəkilən Ticarət Mərkəzində aparılan yoxlama zamanı satışda olan bütün məmulatların, yəni 3515 ədəd zərgərlik məmulatının dövlət əyar damğası ilə damğalanmadığı müəyyən olunub. Həmçinin alıcılara təklif edilən qiymətli metallardan hazırlanmış zərgərlik məmulatlarının 30 faizinin əyarlarının, məmulatın üzərində qeyd edilən əyardan aşağı olması faktları aşkar edilib.
Keyfiyyətsiz zərgərlik məmulatlarını əldə etməklə maliyyə itkilərinə məruz qalmaq təhlükəsi ilə üzləşməmək üçün Maliyyə Nazirliyinin Qiymətli Metallara və Qiymətli Daşlara Nəzarət Dövlət Xidməti vətəndaşlara dövlət əyar damğası ilə damğalanmış zərgərlik məmulatlarını almağı tövsiyə edir.
Mənzillər ucuzlaşıb
2011-ci ilin dekabr ayı ərzində daşınmaz əmlakın təkrar mənzil bazarı seqmentində aparılan araşdırmalar zamanı bağlanan əqdlərin dinamikasında noyabr ayı ilə müqayisədə 0,5% azalma müşahidə edilib. “Əmlak Bazarı İştirakçıları” İctimai Birliyindən verilən məlumata görə, bunun əsas səbəbi ilin sonu ilə əlaqədar ipoteka prosesinin qismən zəifləməsi ilə bağlıdır.
Təkrar mənzil bazarı üzrə ümumi təklif portfelində yeni tikililərin payının artımı dekabr ayında da davam edib. Bazarın bu seqmenti üzrə təklifin artımı qiymət dinamikasının azalmasına da təsirsiz ötüşməyib. Bazarda baş verən proseslərin mənzil tikintisinin tempinə göstərdiyi mənfi təsirlər nəticəsində yeni tikililərin reablitasiya və dövriyyə imkanları xeyli məhdudlaşıb. Bu isə təkrar bazara daxil olan yeni tikililər üzrə qiymətlərin azalmasına gətirib çıxarıb.
Dekabr ayında təkrar mənzil bazarında təklif həcmi əvvəlki ayla müqayisədə 1,0% artıb, orta qiymət isə 0,4% azalıb. Qiymət azalmasına təklifin tələbi kəskin üstələməsi, mənzillərin reablitasiya imkanlarının və nağd satışların məhdudlaşması səbəb olub.
Aparılan araşdırmalardan məlum olub ki, təkrar bazarda mənzillərin qiymət indeksi qiymətə müvafiq olaraq 0,4% azalıb. Təkrar bazarda dinamikaya müsbət təsir göstərən amillərin çox olmasına baxmayaraq, əmlakın bu növü üzrə qiymət azalması ilkin bazardan daha dinamikdir. Bu amil ilkin bazarda qiymətlərin sahibkarların nəzarətində olması, eyni zamanda bazar üzrə qiymətlərin əmlakın real dəyərindən hələ də baha olması ilə əlaqələlidir.
Araşdırmalar göstərir ki, təkrar bazar üzrə mənzillərin əksəriyyəti mənzil mülkiyyətçilərinin müəyyən ehtiyaclarını qarşılamaq məqsədilə bazara çıxarılır ki, burada ekspozisiya müddətinin artımı mənzilin qiymətinə mənfi mənada kəskin təsir göstərir.
Dekabr ayında aktivlik əmsalına görə ən cəlbedici rayonlar ötən ayda olduğu kimi Xətai və Yasamal rayonları olub. Bu rayonların ən vacib cəhəti şəhərə yaxınlığı və qiymətlərin münasibliyidir. Araşdırmalar göstərir ki, bazarda qiymətlər azaldıqca bu rayonlara olan maraq da tədricən dərinləşməkdə davam edir. Ümumilikdə ipoteka prosesində əməliyyatların əsas çəkisi bu 2 rayonun üzərinə düşür. Bu, həmin rayonlarda qiymətlərin ipotekanın normativ tələblərinə uyğunluğu ilə də bağlıdır.
Dekabr ayında təkrar mənzil bazarında qiymət indeksi oktyabrda müqayisədə 0,7 bənd azalaraq 175,2 bənd səviyyəsində qərarlaşıb.
Dekabr ayında aparılan araşdırmalara əsasən təklif nisbi (1,0%) artıb və nəticədə bazara satış üçün təklif olunan mənzillərin sayı 7500-ü ötüb. Yasamal, Nəsimi, Nərimanov və Xətai rayonlarının təklif portfelindəki payı ötən aylarda olduğu kimi mütləq çoxluq təşkil edib və onların ümumi payı 78,7%-ə bərabər olub. Təklif portfelinin strukturunun uzun müddətdir ki, bu 4 rayonun hesabına formalaşmasının əsas səbəbi həmin rayonlar üzrə yeni tikililərin təkrar bazara daxil olması ilə də bağlıdır. Aparılan araşdırmalar göstərir ki, ilkin bazarda da təklif portfeli daha çox bu 4 rayonun hesabına formalaşır.
Dekabr ayında da otaqlar üzrə vəziyyət ötən aylardakı kimi qalıb, 4 və 5 otaqlı mənzillərin sayında azalma qeydə alınıb. Təklif üzrə ən çox azalma 4 və 5 otaqlılar üzrə qeydə alınıb. 1, 2 və 3 otaqlı mənzillərin təklif üzrə payında isə artım müşahidə olunub. Ən çox artım 2 otaqlı mənzillərdə qeydə alınmış və artım 1,2% təşkil etmişdir.
Dekabr ayında qiymət indeksində 0.7 bənd azalma müşahidə edilib. Orta qiymət 0,4% azalaraq ötən ay qeydə alınan 959 $/kv.m-dən 955 $/kv.m-ə enib.
Dekabr ayında heç bir rayonda qiymət artımı baş verməyib. Ən çox qiymət azalması isə Sabunçu rayonunda (1,2%) qeydə alınıb. Bazarda mənzillərin 1 kv.m-nin orta qiymətindən (955 ABŞ dolları) aşağı olan mənzillər ümumi portfeldə daha çox paya, yəni 52,1%-ə malikdir. Mənzillərin orta otaq göstərijisi 2.77, hər otağın orta satış qiyməti 43166 ABŞ dolları, mənzilin orta qiyməti isə 111334 ABŞ dolları təşkil edib.
Yenə də qar yağacaq…
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosundan verilən məlumata görə, fevralın 3-də Bakıda buludlu hava şəraiti üstünlük təşkil edəcək. Gündüz yağıntının tədricən kəsiləcəyi gözlənilir. Şimal-qərb küləyi saniyədə 15-20 metr, arabir 23-25 metr sürətilə əsəcək, günün ikinci yarısında saniyədə 9-14 metrədək zəifləyəcək.
Havanın temperaturunun gecə 3-5, gündüz 0-3 dərəcə şaxta olacağı gözlənilir. Yollar buz bağlayacaq.
Şaxtalı hava şəraiti fevralın 5-dək davam edəcək.
Azərbaycanın rayonlarında havanın fasilələrlə yağıntılı olacağı, qar yağacağı gözlənilir. Bəzi yerlərdə intensiv və güclü olacağı ehtimalı var. Ayrı-ayrı yerlərdə duman olacaq. Mülayim qərb küləyi ayrı-ayrı yerlərdə arabir güclənəcək.
Havanın temperaturunun gecə 3-6 dərəcə şaxta, gündüz 3 dərəcə şaxtadan 2 dərəcəyədək isti, dağlarda gecə 12-17 dərəcə şaxta, gündüz 0-5 dərəcə şaxta, yüksək dağlıq ərazilərdə havanın minimal temperaturunun 18-23 dərəcə şaxta olacağı gözlənilir. Yollar buz bağlayacaq.
Fevralın 3-də Azərbaycanın əksər rayonlarında fasilələrlə yağıntılı olacağı, qar yağacağı gözlənilir. Qarın bəzi yerlərdə intensiv və güclü olacağı ehtimalı var.
Havanın temperaturu gecə 3-6 dərəcə şaxta, gündüz 3 dərəcə şaxtadan 2 dərcəyədək isti, dağlarda gecə 11-16 dərəcə şaxta, gündüz 0-5 dərəcə şaxta olacaq. Yüksək dağlıq ərazilərdə havanın minimal temperaturunun 18-23 dərəcə şaxta olacağı gözlənilir. Yollar buz bağlayacaq.
