Sığortalanmamış bank əmanətləri 1,4 milyard manatı keçib

Əmanətlərin Sığortalanması Fondu iştirakçı banklardan IV rübün təqvim haqlarını toplayıb

Azərbaycan Əmanətlərin Sığortalanması Fondu iştirakçı banklardan IV rübün təqvim haqlarını toplayıb. Fonddan verilən məlumata görə, təqvim haqları 1475 min manat, 1487 min ABŞ dolları, 196 min Avro təşkil edir. İştirakçı bankların sayı 43-dür. 

Əmanətlərin Sığortalanması Fondunun sığorta ehtiyatları 41,9 milyon manat təşkil edir. Fiziki şəxslərin üzv banklarda olan cəmi əmanətləri 3763 milyon manat, qorunmayan əmanətlər 1488 milyon manat, qorunan əmanətlər isə 2275 milyon manat təşkil edir.

Qorunan əmanətçilərin sayı 5782 min nəfərdir. 1 iyun 2010-cu il tarixdən üzv banklarda illik 12 faizdən yuxarı faiz dərəcəsi ilə yerləşdirilmiş əmanətlər fond tərəfindən sığorta olunmur və onlara görə kompensasiya ödənilmir.

Qeyd edək ki, hazırda kompensasiya məbləğinin maksimum həddi 30 min manatdır. Əmanətçilər əmanətlərin sığortalanması üçün heç bir ödəniş etmirlər. Sığorta haqları yalnız banklar tərəfindən ödənilir.

 

 

 

“Unibank” ən yaxşı elan edildi

Bank Azərbaycan Mikromaliyyələşdirmə Assosiasiyasının baş mükafatına layiq görülüb

2011-ci ilin yekunlarına görə “Unibank”, ölkədə mikrobiznesin dəstəklənməsində ən yaxşı maliyyə təsisatı adını alaraq, Azərbaycan Mikromaliyyələşdirmə Assosiasiyasının (AMA) baş mükafatına layiq görüldü. Bankın mətbuat xidmətindən verilən məlumata görə, ötən ilin dekabr ayının sonunda Bankın namizədliyi AMA-nın üç nominasiyasından ikisində irəli sürülüb. Bundan sonra nominantların sifarişlərinə, nüfuzlu beynəlxalq maliyyə təşkilatlarının nümayəndələrindən ibarət olan Assosiasiyanın mükafatlar üzrə Komitəsində baxılırdı. Ötən cümə günü, yanvarın 27-də, AMA-nın mükafatlar üzrə Komitəsinin qərarı ilə, “Unibank” 80 bal topladı və “Azərbaycanda mikro-biznesləri dəstəkləyən təşkilat” nominasiyasında 30 bank və qeyri-bank kredit təşkilatları arasında ən yaxşı hesab edilib.

“Alınan mükafat mikrokreditləşdirmənin fəaliyyətimizdə prioritetlər sırasında olduğunu bir daha təsdiqləyir”, - deyə “Unibank” ASC idarə heyəti sədrinin müavini Faiq Zeynalov bildirib. Onun sözlərinə görə, bankın mikrobiznesə maliyyə dəstəyi onun xırda və orta biznesə qədər yüksəlməsinə yardım edir. F.Zeynalov hesab edir ki, bankların sahibkarlara dəstəyi yalnız kreditlərin ayrılması ilə məhdudlaşmamalıdır. “Bu müştərilərin öz biznes-fəaliyyətlərində nəticələrinin dəqiq nəzərə almaqda çətinlik çəkdiklərinə görə, biz onlara balansın sadələşdirilmiş formasının, habelə gəlirlər və itkilər üzrə hesabatın tərtibatında yardım etməyə çalışırıq” – deyə o qeyd edib.

“Bir çox hallarda mütəxəssislərimiz, müştərinin iştirakı ilə, hətta onun fəaliyyətinin dinamikada təhlilini yerinə yetirirlər. Bu da onlara maliyyə yekunlara daha dəqiq qiymətləndirmək imkanı ilə bərabər, öz biznesini bankir gözü ilə görmək, bütün müsbət və mənfi meylləri aşkar etmək, ən əsası isə, Banka təqdim etdikləri kredit sifarişlərində də lazımi dəqiqləşmələr aparmağa kömək edir”, - deyə F.Zeynalov qeyd edib.

2011-ci ildə “Unibank” ASC-nin mikrokreditləşdirilmə portfeli 2,11 dəfə artıb və 13,350 mln. manatı üstələyib. Bu zaman mikrokreditləri bankın bölgələrdə əsas kredit aləti hesab etmək olar. Belə ki, son bir il ərzində mikrokredit cəlb edən sahibkarların sayı 2500 nəfərdən 5935 nəfərə qədər artmışdır ki, onların da 2/3-i məhz regionları təmsil edir.

Xatırladaq ki, mikrokreditlər “Unibank”-da ən azı yarım il sahibkarlıqla məşğul olan şəxslərə, 2 aydan 2 ilə qədər ayrılır. Mikrokreditlərin məbləği 200-dən 20 minə qədər şərti vahid təşkil edə bilər, girov qismində isə Bank tərəfindən, daşınmaz əmlakla yanaşı, avadanlıq, malların qalığı, kənd təsərrüfatı məhsulları və borcalanın mal-qarası da daxil olmaqla, digər qeyri-standart girov növləri qəbul edilir. Həmçinin qeyd etmək lazımdır ki, “Unibank” ASC-si 2001-ci ildə yaranan Azərbaycan Mikromaliyyələşdirmə Assosiasiyasının 2007-ci ildən fəal üzvlərindən biridir.

 

 

ARDNŞ Böyük Britaniyada avrobondlar yerləşdirəcək

ARDNŞ-nin (Azərbaycan Respublikası Dövlət Neft Şirkəti) avroistiqrazları Böyük Britaniya və Şimali İrlandiya Birləşmiş Krallığı Listinq Orqanının (UK Listing Authority) və London Fond Birjasının (London Stock Exchange) listinqinə daxil ediləcək. Bu barədə ARDNŞ-nin yaydığı məlumatda deyilir.

Avrobondların yerləşdirilməsi və tədavülü Azərbaycanın və Amerika Birləşmiş Ştatlarının hüdudlarından kənarda həyata keçiriləcək.

ARDNŞ bazar ertəsindən avroistiqrazların qarşıdakı yerləşdirilməsi ilə əlaqədar sərmayədarlarla danışıqlara başlayıb. İstiqrazların yerləşdirilməsi bazarın şərtləri nəzərə alınmaqla baş tutacaq. Şərtlər sərmayədarlarla yanvarın 30-da başlayan silsilə görüşlərdən sonta konkretləşdiriləcək.

ARDNŞ 500 milyon dollar həcmində avrobond yerləşdirməyi planlaşdırır.

Məlumatda deyildiyi kimi, bu işlərin həyata keçirilməsində Birgə Baş İdarəçilər (Joint Lead Managers) qismində Citi Group Global Markets Limited, Deutsche Bank AG (London filialı) və The Royal Bank of Scotland Plc., Birgə İdarəçilər (Co-Managers) qismində Nomura International Plc. və Société Générale S.A., İnvestorların təmsilçisi (Trustee) qismində Deutsche Trustee Company Limited, Əsas Ödəniş və Köçürmə Agenti (Principal Paying and Transfer Agent) qismində isə Deutsche Bank AG (London filialı) çıxış edirlər.

ARDNŞ-nin tərkibinə “Azneft” İB (quruda və dənizdə neft və qaz hasilatı müəssisəsi), “Azərikimya” İB (kimya sənayesi müəssisəsi), “Azəriqaz” (qazın paylanması) müəssisəsi daxildir.

ARDNŞ ölkədə neft məhsullarının yeganə istehsalçısıdır (balansında iki NEZ var), eləcə də Azərbaycan, Gürcüstan, Rumıniya və Ukraynada yanacaqdoldurma məntəqələrinə malikdir. Bir müddət əvvəl şirkət İsveçrədə iri YDM şəbəkəsini əldə edib.

ARDNŞ Türkiyənin ən iri neft-kimya kompleksi olan "Petkim"in ortaq sahibidir. Özünün ticarət bölməsi olan “SOCAR Trading” şirkəti vasitəsilə dünyanın müxtəlif regionlarında neft ticarəti həyata keçirir.

 

 

Gömrük tarifi haqqında qanun hazırlanıb

Azərbaycan Dövlət Gömrük Komitəsi gömrük tarifi haqqında qanun layihəsi hazırlayıb və onu razılaşdırılması üçün müvafiq strukturlara göndərib. Bu barədə Azərbaycanda gömrüyün 20 illik fəaliyyətinə həsr edilmiş iclasda çıxış edən komitə sədri Aydın Əliyev bildirib.

Hazırda Azərbaycanda gömrük tarifləri 1995-ci ildə qəbul edilən qanun əsasında tənzimlənir. Gömrük tarifi Azərbaycanın gömrük sərhədi vasitəsilə keçirilən mallara tətbiq edilən və xarici iqtisadi fəaliyyətin mal nomenklaturasına uyğun sistemləşdirilmiş gömrük vergisi qoyuluşlarını nəzərdə tutur.

"Bu gün gömrük qanunvericiliyi üzrə bir sıra normativ-hüquqi aktlar da razılaşdırılır" , - Əliyev qeyd edib.

Komitə sədri onu da bildirib ki, ötən ilin oktyabrında istismara verilən yeni inzibati bina, avtonəqliyyat vasitələrinin gömrük qeydiyyatına alınması üzrə mərkəzin fəaliyyəti öz səmərəsini verir.

"Həmin mərkəzdə "bir pəncərə" prinsipi vasitəsilə gömrük nəzarətinin həyata keçirilməsi və dövlət qeydiyyatı bu prosedurları xeyli asanlaşdırır" , - Əliyev qeyd edib.

İclasda çıxış edən Ümumdünya Ticarət Təşkilatının (ÜTT) potensialın gücləndirilməsi üzrə Avropa regional ofisinin direktoru Vitali Mikeladza əminliyini bildirib ki, Azərbaycan ÜTT-nin fəaliyyətinin genişləndirilməsinə öz töhfəsini verməyə davam edəcək.

Tədbirdə iştirak edən Polşa Gömrük Təşkilatının keçmiş rəhbəri Vatslav Çijoviçin sözlərinə görə, Azərbaycanda dünyada gömrükçülərin hazırlanması və təkmilləşdirilməsi üzrə ən iri mərkəzlərdən biri yaradılır.

"Bu, regionda sayca üçüncü olan gömrük akademiyasının yaradılması sayəsində mümkün olub" , - Çijoviç vurğulayıb.